Manise

Raja Bilher Marpaung

Dison pinggan puti, pinggan na hot di hundulanna,
asa puti so haliapan, puti so hapurpuran.
Panggabean parhorasan di bona ni Hasuhuton on,
tu joloan ni ari on

Dison parbue sangtisangti, parbue botabota.
Boaboa ni jolma gabe ma i, boaboa ni jolma mamora,
di bona ni Hasuhuton on, di hela dohot borunami,
sahat tu joloan on.

Dison tanggotanggo na godang, boaboa ni haroan ro.
Haroan ma antong, marharoan muse,
di bona ni Hasuhuton, di hela dohot di borunami,
tu ari na mangihut.

Dison napuran sitopahon,
Sai topap ma anak tubu, topap ma boru sorang,
di bona ni Hasuhuton, di hela dohot di borunami,
sahat tu ari na naeng ro

Dison ringgit sitio soara,
asa tangkas ma uju purba, tumangkas ma uju pastima.
Tangkas ma na maduma, sai tumangkas ma na mamora,
di Suhut Sihabolonan, di hela dohot di borunami,
pinasupasu ni raja, pinasaut ni Ompunta Na Martua Debata

Dison gambiri simarmiakmiak, miakmiak mahasa.
Asi ma roha ni Ompunta Na Martua Debata,
sai dimiahi ma Hasuhuton on,
songoni nang hela dohot borunami,
sahat tu pagian ni ari.

Ipe nuaeng asa tangkas paboa hamu