Tarsuruk Bulusan Ni Halak

Monang Naipospos

Manggun nasa bitis, mambal nasa botohon. Hata ni turiturian pagodang-godang dohonon. Molo marnonang si Hendry sai adong do siingoton.

Dibaritahon do di sada luat di Sumatera Timur, marlolo ma Angka Raja Adat tinonggo ni Ama Rosu di siala ni parungkilan ni rumatanggana maradophon ripena Na Rosu.

Disi do andap torop dongan sahuta ala marhatohoan karani di PTPN do nasida godangan na di luat i. Bagas nasida be pe tar marudur do pajonok-jonok huhut sarupa torpana.

* * * *

Ala bangko ni halak hita marpollung di lapo tuak, sidung sian ulaonna be sai girgir do nasida lalap di lapo tuak ni Ama ni Manigom namalo maragat i.

Hinais lagi-lagi sian anduri pamiari. Molo dung tardai, ida-ida ma siganup ari. Aman Tanggor ma sada naung sai ida-ida di angur ni arirang botari, dang das tu bagasna ianggo so jolo mandai. Tongon adong manggalangi, madorguhi pe dang be mansadi.

Nunga tonga borngin, mulak ma ibana alai nunga lalo-lalo mardalan. Tungko-tungko pe di topi dalan tung denggan do ibana masisisean. Dang disuhat be ganjang ni dalan, bagas ni halak ma hasahatan.

Dung sahat Aman Tanggor dijabu, bulus do rohana bongot tu bilut podoman. Dang pola manaili Na Rosu nampuna bagas I ai arop do rohana Ama Rosu do na ro. Lalap do ibana manondur tu televisi ala halomoan ni rohana sinetron uju i. Dung sidung tinondurna I, hobas ma ibana tu tataring patupa kopi hasomalan ni Ama Rosu uju mulak sian ulaonna, botari manang tonga borngin.

Aman Tanggor songon na muningan di podoman. Dang hasomalan nasida markulambu, alai boasa adong kulambu? Dipilos ma matana huhut dialathon rupa ni dorpi ni jabu i.  “Bah… boasa ulaning gabe nabalau dorpi ni bagasnami on? Bah,… sadihari adong lamari nabolon dison?…”

“Bah…….. ai begu aha do ulaning mangaliluhon baoadi, ai nunga husuruk jabu ni halak”. Tae-tae ma ibana meret sian bilut sahat ro di alaman….. maporus ma ibana songon niletean ni asu.

Bongot ma Na Rosu tu bilut mamboan kopi pinatupana. Dibagasan holong asa haru las roha ni amanta jabuna. Dung dialathon na soa adong jolma, tarnono ma ibana.

“Bah… ai na tudia dope nuaeng lao amanta on…… marboa-boa pe dang…?, ninna dibagas rohana.

Rohana manungkun, rohana mangalusi. “Ah… na laho do huroa ibana tu lapo manuhor sigaretna”, diulahi ma pareak televisi manondur muse.

Mulak ma Ama Rosu sian ulaonna. Manise ma Na Rosu huhut mangusoi muningan ni rohana. “Ai na sian dia do hamu muse amang siadopan. Nunga huparade nangkin kopi hasomalanmu alai lao damang so marboa-boa”

Longang Ama Rosu ala uso-uso ni ripena. Asing hata sigait ua disarihon ma iba na loja, ima di rohana.

“Eh… da inang…. On dope iba mulak”

“Ipe mulak nimmu….. nangkin nunga sanga modom dipodoman…!!!”

“Modom??? …. On dope au mulak!”

“Bah….. antong ise do namodom nangkin?…”

Tubu ma itang-itang di naso paritang-itangan. Hata dang masiantusan jala dang masihaporseaan. Pagulut masitihasan huhut masisonggahan. Ima mula ni singkam mabarbar manghorhon parbadaan. Dang tola di jabu, mapurpur ma di alaman. Pongkang dongan sahuta sahat tu parriaan. Diontang ma angka Raja mangalehon timbangan. Raja nabisuk sinarea asa marujung di hasintongan. Tampak dongan sahuta laho mangalehon totaran.

Dang tarjua Aman Tanggor be so mangalehon hata sintong, marhatutuhon huhut manopoti sala, hinorhon ni na tuahon do ibana gabe soluk bongot tu bilut ni Ama Rosu.

Ide cerita : Hendry Lumbangaol