PAULAK UNE

Monang Naipospos

Dijou Ompu Pola ma pahompuna manangkasi sadihari nasida dohot amangudana paulauk une di parsaut ni parumaenna i.

“Dang adong Paulak Une Ompung alana denggan do sude” ninna si Pola.

“Denggan boha do nimmu. Taruhon jual do ulaon, paradaton di hitaon do taulahon. Pardalan ni jambar pe natahasomalhon do tapadalan. Nanidokmu nga singkop i sude di roha ni parboru?”

“Ingkon songondinai daba ompung. Datung so sagat parboru i tabaen. Ihurihur pe tamba ni jambar tabahen do tu jualna”

“Bah….ai diantusi ho do molo parboru naniambangan? Olat ni unjuk alap jual do i tarida. Ingkon guru di nasida do saluhut rumang ni paradaton dohot parjambaron. Ingkon jolo mangan sibuhabuhai do nasida dohot hita di bagasna. Alai taruhon jual do ulaon. Ala ni i do umbahen laho hita paulak une, asa une saluhut di nasida nahurang uju ro nasida tu alamanta” ninna Ompu Pola.

“Bah, ai aha partalian ni i tu haiason ni naboru ompung”, ninna si Pola, songon na longang ala ambalang hatorangan ni ompungna dohot nabinegena dohot nabinotona.

“Bah…. Nanidokmu songon dia do huroa na paulak une, Pola?”

“Nahuboto da ompung dohot hatorangan ni siboto adat, molo dang ias do borua i, dungi dipaulak ma denggan denggan, ima ninna paulak une”

Manigor dirambas Ompu Pola ma pahompuna i dohot tungkotna. Tuani do mangaljak ibana unang hona.

“Nanidokmu nuaeng na so siboto adat do au. Buriapus ma ho na so olo marguru tu nasingkop jadi guru pangguruanmu”, ninna Ompu Pola huhut meret marbetebete.