TINTIN MARANGKUP

Monang Naipospos

Sian ompunta nahinan nunga ditanda tintin. Atik na marharoroan sian cincin pe i. Na tarbarita tintin pinungka ni ompunta ima tintin pijor dohot tintin harungguan. Ummarga ma harungguan ala ragam logam dipadomu, songon ulos harungguan ragam motif dipadomu.

TINTIN

Tanda ni paralealeon olo do masileonan tintin. Tanda ni holong pe olo do masileonan tintin. Di angka namora molo pamuli boru, dileon parboru ma tintin tu nampuna bere di helana.
Rahut ni holong ma i asa sisada hela nasida sisada boru. “Borum ma borunghi, helam ma beremi. Asa rap mangamoni ma hita di nasida ampara sidoli”, ninna parboru, dileon ma tintin parpadanan. Adong ma tintin pijor, adong ma i nadeba mangalehon tintin harungguan. Ala dilehon do tong ringgit sitio soara sian najinalona somba ni uhum sian paranak, didok ma tintin marangkup ringgit sitio soara.
Alai dipudian ni ari, dang sai sude tabahen mangalehon tintin. Tung ringgit sitio soara pe i, nilapatanna tarsongon tintin tanda ni parpadanan do i di parboru dohot parbere.

Holan parboru do mangalehon i, dang dohot paranak songon masa nuaeng on. Alana paranak nunga jumolo lao tu huta ni hulahulana patubotohon sangkap pangoli ni anakna huhut mangido “panolopion/restu”. “Manang boru ni ise pe i dan among/ito nanung borum ma i”, ninna inong ni nanaeng mangoli. Dilean ma sombana nasa asam ni todoan ni tulang ni nanaeng parumaenna naung dihatai uju manggoli sinamot.
(Adong do namandok dirina tokoh adat budaya batak toba mandok di sada webinar nanidohotan; “Ndang tintin marangkup, titi marangkup do. Dalan parhitean/buka hubungan parboru dohot parbere”.

Alai ro tu roha, hata melayu do titi. Namarlapatan sisongon i hata batak “hite” do. Adong do hata batak “titi” alai mamilangi manang nanontuhon do, songon “maniti ari, titi ni ari)

Namasa nuaeng on dang tardok be manang dia. Nga tarpaksa ingkon dohot paranak mangalehon. Mungkin ala so lao ma ra paranak manjalo restu sian tulangna, gabe dialaman ma dipadomu dohot nileon ni parboru. Sasintongna janggal do i. Parboru do namanjalin padan tu parbere.
Au pe uju pangoli anak, lao do manopot tulangna tu hutana. Alai gabe tarpaksa do iba dohot muse mangaleon tintin marangkup. Dang tarjua, alana dongan tubu do manotari ulaonniba).

Adong muse paretongan matematika diluar pemahaman. Satonga ni nanileon ni paranak ma dilehon parboru. Mulai adong ma ra aljabar manang seperen. Dang sian ias ni roha ni parboru be mangalehon huhut mangarahut padan tu nampuna bere.

TARINTIN

Molo lomo roha marnida manuk ni sisolhot pinangido ma i asa adong pahanan. Ala metmet dope dibahen ma tanda rahut di patna paima magodang asa dibuat muse. Tanda i didok ma tarintin.
Olo do sipata namboru manggaiti anggi maenna nametmet. Dilehon saputangan manang sengka nauli sibaen las ni rohana. Dungi ro ma namboruna i mandok tu natorasna; “Nunga hutarintini borumi dan ito, tinggal mangalap ma au dung magodang”, ninna.
Aiai dang apala gabe rahutrahut i, sigaiton holong ma i. Ai manuk do ditarintini.