Monang Naipospos
Adong hubege di sada luat, dang dipadohot be ina namabalu manortor paniaran. Dang dapotan be ina namabalu jambar tataring.
Molo toho do dipamasa hamu sisongon ii, ingot hamu ma,….. sala do hamu angka sitotari adat disi. Dang hot totaranmuna i di uhum hasintongan. Adat ni parjahat do i. Molo muruk hamu murukhon.
Paniaran do ina i. Tung mabalu pe ibana hot do tohapna paniaran. Ibana do hahotan ni tataring i. Ido molo mabalu ama didok matompas tataring. Di tortor paniaran na boho, dang haambatan hamu parjongjong ni ina namabalu.
Holan on sipata, naniida dohot nahinilala (ala nunga mabalu iba). Adong bangkol ni ina dohot ama namabalu paherbang tangan dohot marpaniaran. Alai asa tangkas diboto hamu, molo tung bangkol pe roha ni namabalu manortor liatliat dohot marpaniaran, ndang na gabe oraora i di nasida molo hinsa rohana mangihuthon.
Sitongka do sesaon jambar tataring ni ina namabalu ai hahotan ni tataring do ina i. Molo mabalu pe ibana nahatipulan ulu do goar ni i, ndada na tompas tataring i. Na tumagon ama na mabalu do dang dapotan jambar tataring ala nunga matompas tataringna.
Alai na boi hot do i sumuang molo adong gellengna namarsaripe di jolona. Masa nahinan, dang olo namabalu manadinghon jabuna lao tu jolo ni gellengna di pangarantoan.
Asing molo masa saonari. Dipangarantoan nama sude gellengna. Namabalu i ma ditogihon tu pangarantoan i. Masalah kemanusiaan nama i di perkembangan jaman, asa adong patureture natorasna i dung matua.
TanoBatak 